Mu rwego rwo kunoza imikorere no kwegera abanyamuryango b’amakoperative, Ikigo cy’Igihugu gishinzwe Amakoperative (RCA), kuva tariki 8 kugeza 12 Ukuboza 2025 cyakoze ‘Icyumweru cyahariwe amakoperative’ (Cooperative Week Campaign) cyabereye mu Ntara y’Amajyepfo mu turere twa Gisagara, Huye, Ruhango na Muhanga.

Icyumweru cyahariwe amakoperative, ni gahunda yashyizweho n’Ikigo cy’Igihugu gishinzwe Amakoperative (RCA) mu rwego rwo kunoza imikorere, kwegera abanyamuryango b’amakoperative no kubafasha gukuraho imbogamizi bahura nazo mu mikorere yabo ya buri munsi.

‘Icyumweru cyahariwe amakoperative’ (Cooperative Week Campaign) mu Ntara y’Amajyepfo, cyatangirijwe mu Karere ka Gisagara mu Murenge wa Ndora.

                 Abanyamuryango b'amakoperative bitabiriye muri Gisagara

Mu gutangiza iyi gahunda Umuyobozi Mukuru w’Ikigo cy’Igihugu gishinzwe Amakoperative (RCA) Bwana Kamanzi Francis, yavuze ko ‘Icyumweru cyahariwe amakoperative’ ari uburyo bwiza bwo gushyira umuturage ku isonga, kwegereza serivise amakoperative no kumenya imbogamizi ahura nazo zigashakirwa ibisubizo birambye.

Kandi yasabye abayobozi b'amakoperative kuba inyangamugayo bakayobora neza ndetse bagacunga neza umutungo wa koperative. Ndetse yakanguriye abanyumuryango b'amakoperative kuba maso bakamenya uburenganzira bwabo, bagatanga amakuru igihe bayobowe nabi cyangwa hari ushaka kunyereza umutungo wa koperative.

Umuyobozi Mukuru wa RCA Bwana Kamanzi Francis hamwe na Mayor wa Gisagara mu  gutangiza  Icyumweru cyahariwe amakoperative mu Ntara y’Amajyepfo 2025

Muri iki ‘Cyumweru cyahariwe amakoperative’ (Cooperative Week Campaign) mu Ntara y’Amajyepfo, Ikigo cy’Igihugu gishinzwe Amakoperative (RCA), cyafashije amakoperative kubona ibisubizo ku mbogamizi zitandukanye bahura nazo mu mikorere yabo ya buri munsi, kubona ubuzima gatozi, kwemeza komite za towe no gutanga inama ku miyoborere, imikorere n'imicungire y'umutungo wa koperative.

Ndetse amakoperative yamenyeshejwe Itegeko rishya Rigenga Amakoperative mu Rwanda, anasobanurirwa byimbitse imikorere n’imikoreshereze ya Sisiteme ifasha mu kwandika no guha ibyangombwa amakoperative (CMIS).

                  Abanyamuryango b'amakoperative bitabiriye muri Ruhango

Abanyamuryango b'amakoperative bashimiye Ikigo cy’Igihugu gishinzwe Amakoperative (RCA), kuba harashyizweho iyi gahunda nziza yo kubegera bakagaragaza imbogamizi n’ibibazo bahura nabyo bigashakirwa umuti, ndetse bagahabwa inama zo kuvugurura no kunoza imikorere, imiyoborere, n'imicungire y'umutungo wa koperative. Bavuze kandi ko ibindi bigo nabyo bishyizeho gahunda nkizi zo kwegera abaturage byakihutisha serivise n’iterambere ry’Igihugu muri rusange.