Inteko rusange ya koperative igira inama zo mu buryo 2, harimo “Inama y’inteko rusange isanzwe, n’Inama y’inteko rusange idasanzwe”. Isanzwe igaterana muri Werurwe no mu Ukwakira, naho idasanzwe igaterana igihe cyose bibaye ngombwa.

    1. INAMA Y’INTEKO RUSANGE ISANZWE

Inama y’Inteko rusange isanzwe igomba guterana muri Werurwe no mu Ukwakira buri mwaka; aho iba ifite inshingano zikurikira:

1. Gusuzuma no kwemeza ibiri ku murongo w’ibyigwa;

2. Gusuzuma no kwemeza inyandiko mvugo y’inama y’Inteko Rusange iheruka;

3. Gutora abagize inzego zinyuranye cyangwa kubakuraho;

4. Kwemeza abakozi bagize Urwego Nshingwabikorwa;

5. kwemeza abanyamuryango bashya;

6. Kwemeza politiki, amategeko shingiro n’amategeko ngengamikorere byakoperative, n’amavugurura ajyanye na byo;

7. Gusuzuma no kwemeza raporo z’izindi nzego z’ubuyobozi bwa koperative;

8. Gusuzuma no kwemeza raporo y’Inama y’Ubuyobozi y’ibikorwa by’umwaka uheruka;

9. Gusuzuma no kwemeza imikoreshereze y’umutungo wa koperative;

10. Gufata icyemezo cyo kwishyira hamwe n’andi makoperative mu ihuriro, impuzamahuriro cyangwa urugaga cyangwa kwihuza kwa koperative n’indi zigakora imwe, guhagarika ibikorwa byayo, kuyihinduramo sosiyete y’ubucuruzi, kuyivanaho cyangwa kuyisesa;

11. Gushyiraho ushinzwe iyegeranya n’igabagabanya by’umutungo wa koperative n’akanama gashinzwe gukurikirana iseswa ryayo;

12. Kwemeza imbonerahamwe y’imiterere y’inzego z’imirimo ya koperative;

13. Kwemeza umubare ntarengwa w’amafaranga azigamwa n’ashorwa mu bikorwa bya koperative;

14. Gusuzuma no kwemeza umubare w’amafaranga ntarengwa koperative ishobora kuguza;

15. Kwemeza amashimwe n’andi mafaranga bihabwa abagize inzego z’ubuyobozi n’izindi komite;

16. Kwemeza imishahara n’amashimwe by’abakozi ba koperative;

17. Kwemeza gahunda y’ibikorwa biteganyijwe, igenamigambi, gahunda y’ishyirwa mu bikorwa n’ingengo y’imari ijyanye na byo no gukurikirana ishyirwa mu bikorwa ryabyo;

18. Gusuzuma no gufata ingamba ku gihombo koperative yagize;

19. Gusuzuma no kwemeza gahunda y’ibikorwa ya koperative y’umwaka ukurikira;

20. Kwemeza amafaranga ateganyijwe

21. Kwinjira no gusohoka mu mwaka w’ingengo y’imari ukurikira;

22. Gushyiraho umugenzuzi wigenga no kwemeza igihembo ahabwa;

23. Gusuzuma ikindi cyose kireba koperative cyamenyeshejwe abanyamuryango nk’uko amategeko shingiro ya koperative abiteganya.

    2. UMWIHARIKO W’INAMA Y’INTEKO RUSANGE YA WERURWE

1. Inteko rusange yo muri Werurwe ifite inshingano z’umwihariko zikurikira:

2. Gusuzuma uko hakorwa isaranganya ry’umutungo wasagutse n’urwunguko rwabonetse cyangwa uko byashorwa mu bindi bikorwa bya koperative;

3. Gusuzuma no kwemeza raporo y’imikoreshereze y’umutungo wa koperative mu mwaka uheruka nk’uko yemejwe n’igenzura hamwe na raporo y’igenzura.

    

   1. 

         Inama y’Inteko rusange ya COVAMABA

    

    

    3. INTEKO RUSANGE IDASANZWE:

Inteko rusange idasanzwe itegeko riteganya ko ari inteko iterana igihe cyose bibaye ngombwa; ifite inshingano zikurikira:

    1° gusuzuma no kwemeza inyandikomvugo y’inama y’inteko rusange iheruka;

    2° gusuzuma no kwemeza ibyihutirwa bidashobora gutegereza inteko rusange isanzwe.

    4. ITUMIZWA RY’INAMA Y’INTEKO RUSANGE 

1. Inteko Rusange ya koperative itumizwa mu nama isanzwe cyangwa idasanzwe.

2. Inama y’Inteko Rusange itumizwa na Perezida w’Inama y’Ubuyobozi, cyangwa Visi Perezida iyo Perezida adahari, babyibwirije cyangwa babisabwe nibura n’abantu batatu bagize Inama y’Ubuyobozi cyangwa bisabwe nibura na kimwe cya gatatu cy’abanyamuryango cyangwa nibura na kimwe cya gatatu cy’ababahagarariye bagize koperative. Inama y’Inteko Rusange ishobora kandi gutumizwa n’urundi rwego rufite ububasha bwo kuyitumiza cyangwa rwasabye ko itumizwa.

3. Iyo ibi bidashobotse, ku mpamvu z’inyungu rusange, Ikigo cy’Igihugu gishobora gutumiza inama y’Inteko Rusange idasanzwe.

4. Inama y’Inteko Rusange idasanzwe itumizwa igihe cyose bibaye ngombwa.

    5. ITERANA RY’INAMA Y’INTEKO RUSANGE

1. Inama y’Inteko Rusange isanzwe ya koperative iterana ari uko nibura bibiri bya gatatu by’abanyamuryango bemewe cyangwa ababahagarariye bitabiriye iyo nama. Iyo uwo mubare utabonetse ku nshuro ya mbere, inama ihamagazwa bwa kabiri mu gihe kitarenze iminsi irindwi ikurikira.

2. Inama y’Inteko Rusange idasanzwe iterana habonetse nibura bitatu bya kane by’abanyamuryango bemewe cyangwa by’ababahagarariye. Iyo uwo mubare utabonetse ku nshuro ya mbere, inama ihamagazwa bwa kabiri mu gihe kitarenze iminsi itatu y’akazi ikurikira.

3. Iyo umubare wa ngombwa utabonetse ku nshuro ya mbere, ku nshuro ya kabiri Inama y’Inteko Rusange ziterana ku buryo bwemewe ari uko habonetse kimwe cya Kabiri cy’abanyamuryango bagize koperative cyangwa kimwe cya Kabiri cy’abahagarariye abandi bayitabiriye kandi bafite ububasha bwo gutora.

Abanyamuryango bitabiriye Inama y’inteko rusange ya COOPRIKI-CYUNUZI

    6. IBIRI KU MURONGO W’IBYIGWA

1. Gahunda y’ibyigwa n’inama y’Inteko Rusange isanzwe n’idasanzwe itegurwa n’Inama y’Ubuyobozi cyangwa urundi rwego rufite ububasha.

2. Inama y’Inteko Rusange idasanzwe isuzuma gusa ingingo ziri kuri gahunda y’ibyigwa.

    7. AMATORA N’IFATWA RY’IBYEMEZO MU NAMA Y’INTEKO RUSANGE

1. Amatora mu nama y’inteko rusange akorwa hazamuwe ikiganza cyangwa hakoreshejwe ubundi buryo bwumvikanyweho n’abanyamuryango.

2. Umunyamuryango wa koperative cyangwa uhagarariye undi, agira ijwi rimwe, agatora ku giti cye ntawe atumye.

3. Icyemezo cy’inteko rusange isanzwe gifatwa hakurikijwe ubwiganze burunduye bw’amajwi y’abatoye. Iyo ubwiganze burunduye butabonetse amatora asubirwamo. Icyakora, icyemezo kirebana no guhindura amategeko shingiro ya koperative, kwifatanya n’andi makoperative hagamijwe gukora ihuriro, impuzamahuriro cyangwa urugaga, ukwishyira hamwe, kwihinduramo sosiyete no gusesa koperative, byemezwa n’inteko rusange yitabiriwe nibura na bitatu bya kane (3/4) by’abanyamuryango cyangwa ababahagarariye bitabiriye inama kandi batora.

Inama y’Inteko rusange ya KOPAKAMA

     8. INYANDIKOMVUGO Y’INAMA Y’INTEKO RUSANGE

1. Inyandikomvugo y’inama y’Inteko Rusange yandikwa n’Umunyamabanga wa koperative mu gitabo cyabigenewe cyangwa mu buryo bw’ikoranabuhanga.

2. Inyandikomvugo y’inama y’inteko rusange ishyirwaho umukono n’umunyamabanga hamwe n’uwayoboye inama.

3. Abanyamuryango bitabiriye inama y’inteko rusange bashyira umukono ku rutonde rw’abaje mu nama mu gitabo cyangwa uburyo bw’ikoranabuhanga.

4. Raporo y’inama y’inteko rusange ishyikirizwa ubuyobozi bw’Umurenge n’ubw’Akarere koperative ifitemo icyicaro bitarenze iminsi itatu (3) y’akazi uhereye ku munsi inama yateraniyeho. Yohererezwa kandi Ikigo cy’Igihugu mu gihe kitarenze iminsi irindwi (7) ibarwa uhereye ku munsi inama yateraniyeho.

   9. IGIKORWA CYANGWA ICYEMEZO GITESHWA AGACIRO N’IKIGO CY’IGIHUGU

Ikigo cy’Igihugu gifite ububasha bwo gutesha agaciro igikorwa cyangwa icyemezo cyose cyafashwe n’Inteko Rusange kinyuranyije n’amahame, amategeko n’amabwiriza bigenga koperative.