Ku wa Gatanu tariki 12 Ukuboza 2025, ku rwego rw’Akarere ka Huye mu Murenge wa Ngoma hizihijwe umunsi mpuzamahanga w’amakoperative, ufite insanganyamatsiko igira iti "Koperative; umuyoboro udaheza, uganisha ku bisubizo birambye byubaka isi nziza”. 

Ibi birori byabereye muri Stade ya Huye, byahujwe no gusoza Icyumweru cyahariwe amakoperative (Cooperative Week Campaign) cyabereye mu Ntara y’Amajyepfo kuva tariki 8 kugeza 12 Ukuboza 2025.

Umuyobozi wa karere ka Huye Ange Sebutege, yashimiye amakoperative ku bikorwa byayo byindashyikirwa, aboneraho kwibutsa amakoperative kurinda ibyagezweho, kurwanya ruswa n’imirimo mibi ikoreshwa abana, kurwanya isuri, kubungabunga ibidukikije no kwimakaza isuku mu byo bakora byose. Uyu muyobozi kandi yashishikarije amakoperative kongera umusaruro n'ishoramari no kwizigama, kugira ngo bongere iterambere.

                                      Umuyobozi wa karere ka Huye Ange Sebutege

Ndetse yijeje ko akarere kagiye kurushaho gushyira umuturage kwisonga, hakemurwa ibibazo byose biri mu makoperative mu rwego rwo gukomeza kubaka koperative ikomeye iganisha ku bisubizo birambye byubaka igihugu cyiza n’isi nziza muri rusange.

Umuyobozi ushinzwe amakoperative mu Ntara y’Amajyepfo bwana HAMISI Jean Damascene, yashimangiye ko koperative ari inkingi n'umusemburo w’iterambere, aboneraho gusaba amakoperative kurushaho gukomeza gukora cyane bongera umusaruro ndetse batanga inyungu. Ndetse yasabye abayobozi b’amakoperative gukorera mu mucyo bakagendera kw’Itegeko rigenga Amakoperative mu Rwanda, bakirinda ubujura no kunyereza umutungo wa koperative.

 Umuyobozi ushinzwe amakoperative mu Ntara y’Amajyepfo HAMISI Jean Damascene 

Muri ibi birori hashimiwe Koperative Ingenzi za Huye igira uruhare runini mu iterambere ry' akarere ka Huye.

                          Abanyamuryango b'amakoperative bitabiriye ibi birori

Mu Karere ka Huye habarizwa amakoperative 185 ari mu byiciro bitandukanye, mu buhinzi, ubworozi, gutanga serivisi, kongerera agaciro umusaruro w'ibikomoka ku buhinzi n'ubworozi, ubukorikori, SACCO ndetse n’andi akora ibindi bitandukanye.